O cebreiro de Castelo de Brañas coronouse como o mellor da súa denominación na XXII Cata dos Queixos de Galicia. Un galardón que reciben con satisfacción pola visibilidade que lles proporciona, como nos conta dende a queixería Adrián Pérez.
Qué vos aporta un premio coma este?
Sobre todo
visibilidade. Nós este tipo de recoñecemento, máis alá dun
galardón, de gañar ou non gañar, sobre todo é a visibilidade que
che dá, estar rodeado doutros produtores da terra, doutros selos de
calidade… Esa calidade, calidade que nos rodea axuda un pouco a
visibilizar aos que somos máis pequeniños. Aproveitámonos de todos
os que fixeron tan bo traballo durante tantos anos e cremos que nós
tamén podemos estar aí.
Cales son os valores diferenciais dos vosos queixos?
O que penso que é
máis característico do noso queixo é que é un queixo estable, ao
longo de trinta anos xa. É un queixo que ten un puntiño de acidez
pero controlado, que vai cambiando pero que mantén un sabor máis ou
menos igual ao longo do ano. É un traballo duro porque ao final é
un proceso artesanal, faise todo a man e ao final tes que xogar moito
con tempos e demais.
Falabas de visibilización, que me dirías se che conto que hai xente no sur de Galicia que aínda non coñece o queixo do Cebreiro?
Ourense e Pontevedra
quizás sexan as provincias que menos nos coñecen, Coruña e Lugo
si. Pero bueno cada vez nos coñecen máis, a hostalería está
facendo un traballo moi bo. Nós traballando con hostalería quizais
non che posiciona tanto a marca, pero si che posiciona o produto e ao
final tamén nos beneficia. Ensinan como consumilo, educan ao
consumidor.