O Consello da Xunta autorizou hoxe a Consellería do Medio Rural para facer efectiva
unha nova convocatoria das axudas bianuais para os investimentos en elaboración e
comercialización de produtos vitivinícolas, por un importe de 4.500.000 euros, que se
executarán entre o 2025 e o 2026. Estas achegas, que están financiadas polo Fondo
Europeo Agrícola de Garantía (Feaga), publicaranse en breve no Diario Oficial de Galicia
e desde a súa publicación as persoas interesados disporán ata o 31 de xaneiro de 2024
para presentar as súas solicitudes.
Poderán beneficiarse destas achegas bianuais as empresas vitivinícolas, as organizacións
de produtores vitivinícolas, as asociacións de dous ou máis produtores con
personalidade xurídica, as organizacións interprofesionais e as organizacións
profesionais. Serán subvencionables os custos de construción, adquisición ou mellora de
bens inmobles, a compra de nova maquinaria e equipamentos ata o valor de mercado do
produto e os gastos administrativos, sempre que en conxunto non superen o 4 % dos
custos subvencionables totais da operación. Tamén serán subvencionables a adquisición
ou o desenvolvemento de soportes lóxicos de ordenador e de patentes, licenzas,
dereitos de autor ou o rexistro de marcas colectivas.