Preto de 140 persoas viaxan esta semana co programa Coñece a túa provincia da Deputación de Lugo. Son veciños e veciñas dos municipios de Barreiros, Navia de Suarna, Lourenzá, Lugo, Taboada e Pantón os que percorrerán diferentes puntos do territorio -desde o martes e ata o venres- a través desta iniciativa de rutas gratuítas que impulsa a institución provincial para colectivos sen ánimo de lucro, co obxectivo de fomentar o coñecemento da provincia e favorecer o turismo de proximidade.
Este martes as mulleres rurais Tea de Araña de Barreiros e Ledicia de Navia de Suarna serán as protagonistas, con excursións á Ribeira Sacra e á Mariña. As primeiras comezaron a xornada cunha parada na Granxa Gayoso Castro da institución provincial, onde foron recibidas polo Deputado de Recursos Sostibles, Francisco Cajoto, antes de continuar cara Taboada e Chantada. Por outro lado, as mulleres do colectivo da Montaña foron a Cervo para coñecer a fábrica de Sargadelos e a vila de San Cibrao.