O Deputado de Promoción Económica e Social, Pablo Rivera Capón, participou este xoves no VIII Foro Xeoparques de España, que se celebrou na Casa da Cultura de Quiroga. Pablo Rivera estivo no acto inaugural do encontro xunto co Alcalde quirogués, José Luis Rivera Castro, e o presidente do Xeoparque Montañas do Courel, Roberto Castro González.
Esta cita enmárcase no programa que anualmente apoia a Deputación de Lugo cunha achega de 25.000€ para levar a cabo actividades e estudos que permitan potenciar o Xeoparque Montañas do Courel. Trátase dun encontro anual no que estes territorios debaten e propoñen iniciativas comúns, centrándose nesta ocasión no sector agroalimentario. Rivera Capón lembrou a total implicación da Deputación para conseguir a declaración do Xeoarque Montañas do Courel porque “estamos convencidos de que favorece o modelo de desenvolvemento do territorio polo que apostamos, sostible e que aproveita os extraordinarios recursos que contamos para favorecer a actividade económica e axudar así a fixar poboación, tanto no eido do sector servizos e no primario, como no turístico, na cultura e na divulgación científica”.