O alcalde de Vigo, Abel Caballero, deu conta dos datos de turismo do mes de agosto publicados polo Instituto Nacional de Estatística no que Vigo bateu récord no número de visitantes totais e turistas estranxeiros. Deste xeito, achegáronse á cidade 56.792 persoas, un 15,4% máis que no 2019 e un 6,19% máis con respecto ao ano pasado. O turismo procedente do exterior medrou un 41,95% con respecto a 2019.
Os datos amosan que agosto de 2023 foi o mellor agosto de toda a serie histórica. O mesmo ocorre co arranque do ano, no período xaneiro-agosto, co mellor rexistro de turistas desde que hai rexistros.
Para Caballero o Nadal “abriu un mundo” para recibir turismo todo o ano. O alcalde celebrou estes datos e louvou ao sector: “Significa hoteis cheos, restaurantes en funcionamento, cafeterías e comercio... os turistas veñen e consumen”, declarou.