Galicia pretende transformar o 75% da produción endóxena de leite

Unha das metas que proclama a Xunta de Galicia no sector lacteo é, nin máis nin menos, a de chegar a transformar en Galicia o 75% da produción endóxena de leite. Agora mesmo estase a transformar o 63%. Ao menos así o dixo o nselleiro do Medio Rural, José González, no acto de promoción dos queixos galegos “Irmáns de leite”, celebrado na Casa de Galicia en Madrid e no que se puxo en valor a excelencia destes produtos con D.O.P::Arzúa-Ulloa, Cebreiro, San Simón da Costa e Queixo Tetilla.

Os asistentes a este acto de promoción foron recibidos cun viño espumoso galego e, tras o saúdo institucional, puideron participar nunha presentación e cata comentada, conducida por Salomé Beiroa, experta catadora neste tipo de produtos de calidade. A continuación, ofreceuse unha demostración culinaria por parte dos chefs José Manuel Mallón e Miguel Fernández Vidal, ambos os dous embaixadores de Experiencias de calidade. Ademais, habilitáronse tamén postos de queixerías das DOP que amosaron e deron a degustar o seu produto.