O Coñece a túa provincia promove o turismo de proximidade e leva de viaxe a máis de 170 veciños e veciñas de cinco concellos lucenses

 

Veciñas e veciños de cinco concellos da provincia participarán esta semana no programa Coñece a túa provincia da Deputación de Lugo. Son en total máis de 170 persoas dos municipios de Antas de Ulla, Lugo, O Valadouro, Pedrafita do Cebreiro e Taboada as que, dende este martes e ata o venres, percorrerán o territorio lucense grazas ás viaxes gratuítas que impulsa a institución provincial para colectivos sen ánimo de lucro.

En total esta primaveira 1.800 persoas de 80 colectivos lucenses teñen reservadas as súas viaxes pola provincia ata finais do mes de xuño con esta iniciativa para fomentar o turismo de proximidade, seguir favorecendo o coñecemento da provincia entre a veciñanza, e ao mesmo tempo apoiar a actividade económica nestes concellos.