A Deputación recibe os cinco anteproxectos para rehabilitar o convento de Santa Clara, en Pontevedra

 

“Aquí está o futuro de Santa Clara”. Así o dixo hoxe o vicepresidente César Mosquera ao amosar a documentación dos cinco anteproxectos aspirantes para rehabilitar o  convento das clarisas e convertelo en parte do Museo de Pontevedra. Todas as equipas finalistas (as firmas Nieto Sobejano, Kengo Kuma, a UTE David Chipperfield-Carlos Seoane, Kaan, e a UTE Snohetta-Alfonso Penela) entregaron a documentación en tempo e forma esta semana e agora abrirase o proceso de deliberación do xurado para escoller a proposta gañadora.

Os traballos recibíronse na Deputación  tanto por vía dixital como fisicamente (en total pesan máis de 20 quilos), e de maneira anónima baixo lema, xa que o xurado non pode coñecer nada sobre as equipas autoras. As lendas elixidas foron ‘Revelación’, ‘Abrente’, ‘ Piedra y madera’, ‘Verbas da Pedra’ e ‘Os inicios’.