Vendedoras do Mercado de Abastos de Pontevedra protagonizan vídeos para dar a coñecer as súas vidas e visibilizar o seu labor co gallo do 8M

No marco do 8 de marzo, Día Internacional da Muller, a Concellería de Promoción Económica de Pontevedra acaba de lanzar tres vídeos protagonizados polas vendedoras do Mercado de Abastos de Pontevedra coa finalidade de dar a coñecer diversos aspectos das súas vidas e de poñer en valor o seu inxente labor. Englobadas baixo o título de Mulleres que Contan, as pezas audiovisuais elaboradas pola firma Ydeaweb (de entre 3 e 4 minutos de duración) adéntranse nos proxectos e soños persoais das praceiras entrevistadas, narran como comezaron a traballar nas instalacións da rúa Serra e falan sobre as mulleres que foron e son as súas referentes.