Investimento de 519.000 euros para poñer en marcha o proxecto Tourist Inside II en Pontevedra

A Deputación de Pontevedra vén de mobilizar preto de 3,8 millóns para 25 concellos da provincia: 2,5 millóns do Plan Concellos e 1,3 millóns procedentes de fondos europeos para seguir impulsando a transformación dixital do turismo a través do programa “Tourist Inside II” e para a eficiencia enerxética dos servizos de abastecemento de augas residuais.

Ademais dos recursos que se van mobilizar a través do Plan Concellos, a presidenta Carmela Silva tamén deu conta “dun investimento de 519.000 euros para poñer en marcha o proxecto Tourist Inside II”. Carmela Silva lembrou que “xa investimos a través do primeiro Tourist Inside 2 millóns de euros que nos permitiron modernizar o turismo dixital na provincia”, transformando 12 das 33 oficinas da rede Info Rías Baixas e o Palacete das Mendoza e co proxecto piloto de praia intelixente en Nigrán. E, con estes novos recursos, “imos modernizar outras sete –As Neves, Tui, Redondela, Salvaterra de Miño, O Rosal, Mondariz-Balneario e Ponteareas– e tamén implantar novas ferramentas na web de Turismo Rías Baixas, formar o persoal de atención, elaborar diagnoses de ciberseguridade e implantar unha ferramenta de mellora de fluxos nas oficinas e no Castelo de Soutomaior”.