A Asociación Provincial de Empresarios de Hostelería e Turismo de Lugo (Apehl) estivo representada no Campeonato Oficial Hostelería de España-Tapas y Pinchos 2023 por Rubén David Goyzueta, do restaurante Nadela, gañador do XVII Concurso de Tapas de Lugo, certame celebrado na cidade durante o pasado mes de novembro.
A provincia de Lugo defendeu a súa candidatura neste campionato celebrado en Madrid Fusión. O restaurante Nadela, cuxo responsable é Nacho Carballeira, levou o primeiro posto do xurado técnico no XVII Concurso de Tapas de Lugo e para o Campeonato Oficial Hostelería de España-Tapas y Pinchos 2023, o cociñeiro Rubén David Goyzueta, coa axuda de Roi Mouriz, presentou a seguinte proposta: Canelón de galo de Mos no seu mollo de asado, castaña de Galicia caramelizada, cogomelos silvestres e aceite de Quiroga.
No Campionato, organizado por Hostelería de España, competiron trinta e un establecementos hostaleiros en representación das asociacións e federacións provinciais de hostalería, que puxeron en valor a tapa como elemento esencial da gastronomía española demostrando calidade, creatividade e profesionalidade.
Finalmente, a vitoria foi para Susana Casanova de Clandestina Café Bistró, que ía en representación da Federación de Empresarios de Hostelería de Zaragoza (Horeca Zaragoza) coa súa tapa Cruz de Navajas.
Os outros cinco finalistas que participaron na fase final en representación das asociacións e federacións provinciais de hostalería foron: Jorge Otxoa, da Asociación de Hostelería e Turismo de Navarra; Mario Fernández, de Otea, Hostelería e Turismo de Asturias; Mariano Sánchez, de Gremi de Restauració de Barcelona; Diego Morales, da Asociación Provincial de Empresarios de Hostelería e Turismo de Ciudad Real e David Rodríguez, de Hostelería Guipuzkoa.