Zonas de descanso intelixentes para os comercios e mercados da provincia de Pontevedra

 

O concelleiro de Mobilidade de Moaña, Rodrigo Currás, recibiu da man da deputada delegada de Promoción Económica e Emprego da Deputación de Pontevedra, Raquel Giráldez, as novas zonas de descanso verdes instaladas no municipio para potenciar o comercio local, converténdose así nun dos primeiros concellos en recibir estas novas dotacións. En total, ao longo dos últimos meses instaláronse estas áreas de descanso en 20 concellos da provincia ao abeiro dos proxectos “Da túa man”, dirixido a municipios para o apoio a mercados, zonas urbanas comerciais, comercio non sedentario e canles curtas de comercialización, e “Commerce Inside”, dirixido a concellos turísticos. Os proxectos, dos que o Ministerio de Industria, Comercio e Turismo a través do Plan de Recuperación financia o 70% do orzamento, buscan favorecer o comercio polo miúdo e axudarlle a abordar os retos dixitais aos que se enfrontan na actualidade os establecementos de proximidade.

Os concellos beneficiarios son os de Moaña, A Cañiza, Gondomar, Meaño, Silleda, Ribadumia, Poio, Ponte Caldelas, O Rosal, Salceda de Caselas e Tomiño, no caso do proxecto “Da túa man”, e Baiona, Bueu, Tui, Soutomaior, Caldas de Reis, Nigrán, Sanxenxo, Cambados e O Grove, a través de “Commerce Inside”.