Galicia sitúase como a segunda comunidade con máis Destinos Turísticos Intelixentes


Galicia segue gañando peso na Rede de Destinos Turísticos Intelixentes posta en marcha polo Ministerio de Industria, Comercio e Turismo. Na última reunión da súa comisión executiva, celebrada o 30 de setembro e presidida polo Secretario de Estado de Turismo, Fernando Valdés, foi aprobada a adhesión dun total de 67 novos destinos de toda España, dos que case a metade son municipios galegos: A Bola, A Merca, A Pobra do Caramiñal, A Rúa, A Veiga, Bande, Betanzos, Cartelle, Celanova, Entrimo, Gomesende, Larouco, Lobeira, Lobios, Miño, Muíños, Noia, O Barco de Valdeorras, O Bolo, O Carballiño, Padrenda, Petín, Pontedeume, Quintela de Leirado, Ramirás, Rubiá, Valga, Verea, Vilamartín de Valdeorras e Vilanova de Arousa.

Coa incorporación destes concellos, Galicia suma xa 78 membros na Rede DTI, o que a converte na segunda comunidade autónoma con maior presencia sendo superada unicamente por Andalucía, con 98. Por detrás quedan xa Castela e León (44), as Illas Canarias (32), Asturias (26), Cataluña e a Comunidade Valenciana (ambas as con 24) ou Murcia (19),

Desde a Rede DTI detallan que na actualidade está formada por 610 membros, dos que 437 son destinos membros titulares, 79 son institucións, 91 son empresas colaboradoras e 3 son observadores. Ademais, destacan que os municipios adheridos representan ao 44 % da poboación española e que 42 das 52 capitais de provincia forman parte da rede.

Aínda así, para asegurar a boa calidade no acompañamento dos destinos adheridos, a comisión executiva decidiu paralizar temporalmente o procedemento de adhesión de novos membros á espera de que proceda a consolidar a incorporación, categorización e a diagnose dos destinos que xa forman parte da rede, según recolle na súa web o Clúster Turismo de Galicia