Este venres púxose en marcha o proxecto europeo 'Máquinas do tempo urbanas', no que toma parte a Casa das Ciencias da Coruña e que se prolongará ata o outono do 2024, con distintas actividades que buscan promover traballos poéticos contemporáneos, experimentais e innovadores, para crear experiencias inmersivas do público en planetarios europeos, a través de actuacións en directo con narracións orais e visuais.
O primeiro paso da iniciativa, financiada polo programa Europa Creativa, da Unión Europea, é convocar a poetas de toda Europa para participaren en tres períodos de residencia nas tres universidades participantes no proxecto: a Escola de Arte, Deseño e Arquitectura de Helsinki-Universidade Aalto; a academia polaco-xaponesa de Tecnoloxías da Información de Varsovia; e a Real Academia de Belas Artes de Amberes.
Cada grupo de poetas e de estudantado levará as obras realizadas a un festival de poesía, a toda a cúpula, en directo, nos planetarios participantes. Neste sentido, ademais do planetario da Casa das Ciencias da Coruña, toman parte os planetarios de Tartu (Estonia), Viena (Austria) e Bruxelas (Bélxica). O festival que acollerá o planetario da Casa das Ciencias terá lugar en marzo de 2024.
As persoas que desexen participar deben presentar toda a información requirida neste formulario, antes da medianoite do vindeiro día 10 de novembro.
Toda dúbida relacionada coa solicitude debe remitirse ao correo electrónico utmcallforpoets@gmail.com.