O Museo Casa de la Troya permanece aberto ao público ata o vindeiro 15 de outubro. Durante estas semanas poderá visitarse os xoves, venres e sábados. O horario do museo é de 11:00 a 14:00 e de 16:00 a 20:00 horas. Todas as visitas son guiadas e teñen unha duración duns 25 minutos, en grupos de dez persoas máximo.
O Museo Casa de la Troya continúa coa súa actividade dos Venres Troyanos, roteiros culturais teatralizados por diferentes rúas e prazas do casco antigo de Compostela que buscan achegar aos participantes, de maneira amena e divertida, os feitos históricos relativos ao tempo no que transcorre a novela de Pérez Lugín La Casa de la Troya. A primeira destas citas será este venres, día 16. Seguirán outras o 23 de setembro e os días 7 e 14 de outubro.
Estes roteiros dramatizados parten da praza de Mazarelos, ao pé da estatua de Montero Ríos, ás 19:00 horas, e rematan cunha visita ao Museo Casa de la Troya aproximadamente unha hora e media máis tarde, sobre as 20:30 horas. O número máximo de participantes por cada visita é de 15.
Pódese realizar reserva previa enviando un correo electrónico ( visitas@lacasadelatroya.gal ) ou chamando aos teléfonos do museo (981 585 159 / 695 211 266). Estas visitas guiadas teñen un custo de 5 € e de 2 € para os menores de 16 anos.
Benigno Amor, presidente da Asociación de Antiguos Tunos Compostelanos, entidade que xestiona o museo, explica que estes roteiros “ofrecen a posibilidade de viaxar no tempo ata a Compostela de finais do século XIX da man de Casimiro Barcala, o estudante recreado por Pérez Lugín na súa novela; interpretado por Suso Martínez, historiador, guía turístico, divulgador e actor especializado na historia de Galicia”.