Aspace Coruña deu un paso máis co seu proxecto de alimentación texturada coa elaboración dun receitario que inclúe unha gran variedade de menús para que as familias das persoas con parálise cerebral poidan preparar pratos nas súas casas con esta innovadora técnica culinaria.
A publicación deste receitario, creado polo equipo de Logopedia da asociación e deseñado pola Federación Aspace Galicia, foi posible grazas ao apoio da Deputación da Coruña, que colaborou coa impresión de 300 exemplares. A deputada provincial de Benestar Social, Ana Lamas, acudiu a Aspace Coruña para realizar a entrega e poder coñecer en primeira persoa o proxecto de texturación, que a asociación iniciou en 2018 e que é un tipo de técnica que permite ofrecer pratos que conservan o sabor e aparencia do prato orixinal cunha textura segura para a persoa con parálise cerebral con problemas de disfaxia (dificultade para tragar alimentos e/o bebidas).
Ana Lamas estivo acompañada pola presidenta de Aspace Coruña, Mª Carmen Barreiro, o xerente, Ricardo Iglesias, e Eulogio López, vogal da Xunta Directiva, e polo xefe de Cociña, Óscar Romero, que fixo unha demostración do que supón a transformación dun prato común a un texturado. Na actualidade, non existe un proxecto similar a este en toda a provincia e a deputada destacou a aposta de Aspace Coruña "por promover sempre proxectos innovadores", dando un paso máis para mellorar a calidade de vida das persoas e que poden poñer en marcha outras entidades, de discapacidade ou persoas maiores, contando co equipamento necesario.
Pola súa banda, os representantes da asociación explicáron que esta iniciativa mellorou sen dúbida a satisfacción na alimentación das persoas con parálise cerebral da asociación, ofrecéndolles pratos máis seguros e saborosos. "Queriamos que tamén puidesen gozar na súa casa desta alimentación, por iso fixemos este receitario, para eles e as súas familias", afirmou o xerente.
Así, todas as persoas con algunha dificultade na mastigación ou deglución poden gozar de pratos saborosos e seguros, sen fíos nin hebras, e adaptado ás súas necesidades tanto físicas como nutricionais.
Antes as persoas con disfaxia comían comida triturada, mesturando os alimentos nun puré no que se perdía o sabor e olor característico de cada alimento. En cambio, agora a alimentación texturada permite que gocen da comida como os demais, sen renunciar a comer o que lles gusta e favorecendo a súa motivación, apetito e participación social. "Con esta nova técnica hai persoas que con 40 anos souberon por primeira vez a que sabe un tomate, unha tortilla ou un filete", afirmaron.
En Aspace Coruña a alimentación texturada é froito dun traballo en equipo de Logopedia e Cociña, cunha valoración de cada unha das persoas con parálise cerebral e coa adaptación de todos os menús. Cada ano na asociación sérvense preto de 69.000 menús, dos que máis de 30.000 son texturados. Na actualidade, desde cociña se texturados as comidas, merendas e ceas.