Pontevedra quece fogóns para I Campionato de Tapas de Galicia


Pontevedra quece os seus fogóns para recibir aos mellores cociñeiros de tapas de Galicia. A Concellería de Promoción Económica e Turismo e a Academia da Tapa e o Pintxo acaban de abrir o prazo de inscricións para que chefs das catro provincias galegas midan as súas destrezas no I Campionato de Tapas de Galicia, un evento en formato showcooking que se celebrará durante os días 2 e 3 de maio e aberto de xeito gratuíto a todos aqueles e aquelas que desexen amosar a súa creatividade e innovación no eido da gastronomía en miniatura. Os participantes neste certame optarán a máis de 3.000 euros en premios dos produtos das marcas patrocinadoras e colaboradoras.

A convocatoria está especialmente dirixida para profesionais en activo, representantes dun establecemento hostaleiro situado en A Coruña, Lugo, Ourense ou Pontevedra que dispoña de bar e teña unha oferta de pinchos ou tapas continuada ao longo do ano. O prazo de inscricións permanecerá aberto ata o día 11 abril a través do formulario habilitado na páxina web do campionato: https://www.academiadelatapa.com/i-campionato-de-tapas-e-galicia-pontevedra-2022-gallego/.

O programa da competición foi presentado pola concelleira de Promoción Económica, Yoya Blanco; o presidente da Academia da Tapa e o Pintxo, Mikel Martínez, e a responsable da firma Carta Blanca, Elena Vitoria. Tal e como subliñou a edil socialista, “este primeiro e pioneiro Campionato de Tapas de Galicia supón outro enorme paso adiante dentro do proxecto Pontevedra Capital Gastro e no noso decidido obxectivo de converter a esta cidade en Capital Española da Gastronomía (CEG) 2023”.