Varios produtores falarán da súa experiencia traballando nos sectores da carne e silvícola, da realidade de sacar estas producións adiante así como da comercialización. Tamén abordarase a normativo europea, a estratexia da Comisión Europea, e a situación actual e futura da agricultura ecolóxica.
Será este 27 e 28 de decembro de 2021, repartidas en dúas horas por día e emitidas en directo na canle de Youtube do CRAEGA - Por cuestións sanitarias escolleuse a celebración online dunha cita que en anteriores ocasións celebrábase presencialmente.
O Consello Regulador da Agricultura Ecolóxica de Galicia centrarase nestas dúas producións para dar a coñecer ao consumidor final e tamén aos profesionais as características concretas delas, pero para poder confrontar modelos de fóra de Galicia. A cita será dinámica, falará cada relator convidado individualmente un a continuación do outro, deixando os últimos 10 minutos para preguntas dos espectadores.
Promovida polo Consello Regulador da Agricultura Ecolóxica de Galicia os seis convidados abranguen tódolos aspectos de interese: lexislación europea, consultoría agroalimentaria, distribución e experiencias de traballo en cooperativas e empresas. Estes son os participantes segundo a xornada:
XORNADA 27 DECEMBRO
Diego Canga Fano , coñecedor das institucións europeas nas que traballa dende principios do anos 90, analizará o Plan de Acción para a Produción Ecolóxica así como a Estratexia da Granxa á Mesa (“Farm to Fork” en inglés) que quere ampliar a superficie dedicada a cultivos ecolóxicos de aquí a 2030, ambos plans da Comisión Europea. É Conselleiro principal da Comisión Europea na Dirección Xeral de Agricultura e Medio Rural.
Jon Garai amosará o exemplo da produción e comercialización no seu territorio. Coordina a Asociación Ekoalde Elkartea, agrupación de produtores ecolóxicos de Navarra de todo tipo de produtos. Os seus asociados obteñen un prezo xusto pola venda aos clientes, aos que chegan coa distribución e loxística que se fai dende Noáin.
Isabel Gómez Rodríguez , Xerente de Traloagro S.L., contará a súa experiencia nesta empresa familiar que produce carne de vacún e polo en ecolóxico, e que vende dende a sala de despece e tenda-supermercado de Friol, así como dende a Praza de Abastos en Lugo.
XORNADA 28 DE DECEMBRO
Jean Luc Bellat falará do funcionamento en Francia do mercado da castaña, escaso en canto a produción pero cunha venda dinámica e de gran volume. Consultor en JLB Consulting no ámbito agroalimentario, especialista no mundo da castaña e xerente en Decorin Sàrl, traballa en diferentes países pero cunha produción da castaña centrada no mercado francés.
Rubén Fernández é o conselleiro delegado da empresa familiar fonsagradina Casa Castelao S.L. Fundada en 1999 está especializada na produción de porco celta e ecolóxico así como de carnes e derivados como xamón, lacón e chourizos. A firma traballa non só o mercado español senón tamén o estranxeiro. O empresario contará de primeira man a súa experiencia e visión do sector porcino ecolóxico.
Maite Bruzos é a responsable de Calidade en Pazo de Lusío S.L., empresa apícola familiar (Meles Anta) con orixe en Samos, explicará como evolucionou esta firma, cales son as dificultades da produción e como están a vender en diferentes mercado dende Bóveda (Lugo). Alí realizan todo o proceso traballando un mel ecolóxico recollido en diferentes concellos de montaña.