O XVII Concurso de Tapas Picadillo viviu este mércores o seu peche coa entrega de premios ás mellores tapas das diferentes categorías desta edición. A alcaldesa da Coruña, Inés Rey, xunto ao concelleiro de Turismo, Juan Ignacio Borrego, o xerente de Turismo da Coruña, Moisés Jorge Naranjo, e a presidenta do xurado, neta do alcalde Picadillo e membro da Academia Galega de Gastronomía, Chau Fernández-Gago Puga, entregaron os premios.
A alcaldesa, Inés Rey, agradeceu o alto nivel do concurso de tapas máis antigo dos que se celebran en Galicia que asegurou "contribúe a facer que a nosa cidade sexa referente na gastronomía do noroeste de España".
O xurado da categoría Tradicional escolleu que a tapa 'Bolo de vento de bacallau con marmelada de pemento de Padrón e tomate' de Mesón de Herves fose a mellor tapa. Nesta categoría tamén houbo unha mención especial para as 'Croquetas cremosas de espinacas' do Restaurante Morriña.
Na categoría Creativa, a tapa gañadora foi o 'Porro asado, requeixo, mel e améndoas torradas' de Intenso Cocina Peculiar mentres que a tapa 'Aire fresco' de Casa Surrey recibiu a Mención Especial.
Precisamente esa tapa de Casa Surrey foi a gañadora da categoría Maridaxe ao ser escollida como a mellor combinación proposta co viño da Denominación de Orixe Monterrei 'Mara Moura 2019'. A mención especial desta categoría foi para Cosecha 81 coa tapa 'Galicia Calidade' que maridaba co viño 'Trasdovento'.
Por último, o Premio Cidade da Coruña 2021, escollido por votación popular a través dos códigos QR dispoñibles nos establecementos foi para a tapa 'Albóndegas de rabo de tenreira con puré de batatas, labras de xamón e flocos de queixo Galmesano' do restaurante Ajetreo.
Os establecementos gañadores recibiron o premio de 1.000€ nas categorías Tradicional e Creativa ademais do diploma conmemorativo e a chaquetilla, mentres que o premio nas categorías Maridaxe e no Cidade da Coruña de votación popular foi de 500€.
XVII Concurso Tapas Picadillo
Este certame, que toma o nome de Manuel María Puga y Parga, máis coñecido como "Picadillo", quen foi alcalde da Coruña nos anos 1915 e 1917 e tamén foi un recoñecido escritor e gastrónomo, é o máis antigo de Galicia.
Nesta edición houbo 72 tapas participantes, 42 na categoría Tradicional e 30 na Creativa. Ademais, 22 tapas participaron tamén na categoría Maridaxe con viños da D.O. Monterrei, sendo todas as propostas deseñadas especificamente para o concurso e elaboradas de maneira artesá e sempre incluíndo produtos galegos.
Para ser admitido a concurso, as tapas pasaron unha fase previa de avaliación e unha vez en concurso, un xurado de expertos escolleu as mellores tapas baseándose nos criterios de sabor, elaboración, presentación e relación calidade-prezo. Seguindo estes criterios, nunha terceira fase foi un novo xurado de expertos o que escolleu a tapa gañadora en cada categoría. Por outra parte, as tapas participantes na categoría maridaxe foron valoradas por un xurado de sumilleres e expertos en viño.
Para este concurso contouse tamén coa colaboración da Asociación de Celíacos de Galicia (ACEGA), Estrella Galicia, e Hostelería por el Clima.