O concelleiro de Festas Gonzalo Muíños e a directora do Mercado da Estrela, Mónica Mejías deron conta dunha nova edición do festival do talento galego, que festexando o seu 10º Aniversario, se celebrará en Santiago de Compostela dende o xoves 16 ata o domingo 19 de decembro. Na rolda de prensa estiveron acompañados da xerente de Turismo de Santiago, Flavia Ramil, a xerente da Fundación Pública Artesanía de Galicia, Elena Fabeiro e o delegado comercial de Estrella Galicia, Guillermo Fernández.
O Mercado da Estrela é un festival de Nadal coorganizado polo Concello de Santiago e Correveydile no que as persoas creadoras de Galicia amosan o froito do seu talento nas vésperas das festas para que os visitantes desfruten das súas creacións, pezas, produtos, elaboracións e composicións durante o evento ou as convirtan en orixinais e innovadores agasallos adquiridos baixo o selo de #talentogalego.
Posicionado como centro neurálxico en Galicia para as compras, os reencontros e os brindes na semana previa a Noiteboa, o Mercado da Estrela conta co patrocinio da Direccion xeral de Comercio e Consumo apoiando á marca Artesanía de Galicia, Turismo de Santiago de Compostela, Estrella Galicia e Gadis, o apoio de Paco&Lola, Vermú Lodeiros e Finsa e a colaboración do Seminario Maior, a “Hospedería San Martín Pinario”, Abanca e o Centro Don Bosco como localizacións anfitrionas do evento.
Na súa interveción, Flavia Ramil quixo poñer o foco na importancia deste evento como "dinamizador da capital galega nun dos períodos máis relaxados a nivel de demanda turística". Neste senso, a xerente de Turismo de Santiago salientou que esta décima edición do Mercado da Estrela amosa que xa é un festival de referencia "non só para a cidadanía de Santiago, senón tamén para o público galego e o turismo de proximidade".
Case un centenar de marcas de artesanía, moda, ilustración, xoguetes, fotografía, deseño, decoración, produtos enogastronómicos e últimas tendencias participarán na feira creativa contemporánea durante a fin de semana previa a Nadal nunha oferta que completará a súa proposta para este aniversario con foodtrucks, postos de restauración e un atractivo programa de concertos, sesións picadiscos e obradoiros deseñados para gozar da creatividade e do tempo compartido.
Un festival de balde que reparte os seus contidos entre diferentes espazos de destacado valor histórico e patrimonial de Santiago de Compostela para redescubrilos a través dun percorrido que permite coñecer a impresionante riqueza arquitectónica e cultural desta cidade Patrimonio da Humanidade mentres se desfruta do animada ambiente que caracteriza ao festival e se descubre o talento creativa das novas marcas de Galicia.
A programación musical para este 10º aniversario iráse revelando progresivamente nos vindeiros días e, ao igual que a Feira Creativa e as Zonas de Restauración será de entrada gratuíta e cumprirá con todos os protocolos de seguridade, hixiene e prevención velando pola protección de todas e todos.
Aquelas persoas que decidan visitar a cidade con motivo do Mercado da Estrela poden dende xa reservar aloxamento na hospedería do mosteiro barroco de San Mariño Pinario a un prezo reducido con motivo do festival.
Bases de participación para marcas:
Máis de medio centenar de marcas teñen presentado xa nas últimas catro xornadas a súa preinscrición para participar desta edición aniversario. É todavía posible solicitar praza enviando solicitude a través dos formularios online insertos nas bases de participación ata a medianoite do vindeiro xoves 25 de novembro.