A área de Turismo da Deputación da Coruña presentará na Feira Internacional de Turismo (FITUR), que se celebra dos día 19 a 23 de maio en Madrid, o proxecto do Cabo Ortegal que presentará proximamente a súa candidatura a Xeoparque da Unesco. Cun acto de presentación no programa oficial, o vicepresidente e deputado de Turismo, Xosé Regueira, defenderá os recursos e valores do territorio diante de axentes turísticos e público profesional e institucional.
O día 19 ás 14 horas na praza central do Pavillón de Galicia en Fitur, a Deputación da Coruña presentará o Cabo Ortegal como destino turístico e patrimonial co fin de afortalar a súa candidatura á declaración oficial de Xeoparque por parte da Unesco. Nun acto que estará acompañado por material audiovisual que mostra a espectacularidade das paisaxes de Ortegal, o vicepresidente e deputado de Turismo da Deputación da Coruña, Xosé Regueira, xunto co presidente do Consello de Dirección do proxecto e alcalde de Valdoviño, Alberto González, explicarán diante dun auditorio especializado os recursos e valores do territorio para competir pola declaración oficial como xeoparque.