A Deputación de Ourense aproveita o deporte de élite para promocionar turísticamente o destino. O presidente , Manuel Baltar, presentou xunto ao presidente da comisión xestora da Federación Galega de Hóckey, Alberto Estévez; e ao vogal da xunta directiva desta federación, Francisco Masid, a fase final do Campionato de España de Primeira División de Hóckey Sala Masculino, que organiza a Federación Galega de Hóckey e que se celebrará no Pazo dos Deportes "Paco Paz" de Ourense os días 5, 6 e 7 de febreiro. O evento será retransmitido vía streaming a través da canle de Youtube da Federación Galega de Hockey.
O campionato, na súa 68º edición, dispútano os oito mellores conxuntos nacionais da categoría de Primeira División Sénior Masculino, divididos en dous grupos de catro equipos que disputan as primeiras prazas de grupo que dan acceso ás semifinais. Os equipos son: no Grupo A ( FC Barcelona, CD Málaga 91, CH Barrocas, R.S. Tenis La Magdalena) e no Grupo B (SPV Complutense, CH Madrid Las Rozas, CH Carpesa, CH Alcala).
O campionato é clasificatorio para o EuroHockey Indoor Club Championships, o Campionato de Europa de Clubs, e o campión nacional terá clasificación directa, representando así a España nesta competición internacional.