MdR HGg&T 228_ Conclave de cocidos na praza forte do Porco Celta

Poucos pratos tradicionais contan cunha saúde tan boa como a do cocido galego, que segue multiplicando as súas festas de exaltación por toda a nosa xeografía, triunfa na cidade e no rural e namora ás novas xeracións como xa fixo coas vellas. 

Para esta mesa de redacción fómonos ata Sarria, ampliando ata sete o número de contertulios (xa se sabe que o cocido pide mesa grande). Falamos das diferencias entre os cocidos, das claves do seu éxito actual, da importancia da calidade dos ingredientes e da presentación para manter a súa popularidade… E aproveitando que estábamos na sede da Feira do Cocido do Porco Celta, atrevémonos a albiscar a posibilidade dun cocido “gourmet” como reclamo turístico para a comarca. 

Tomamos como punto de partida o eterno debate de taberna, a busca da máis “auténtica” receita do cocido galego: se debe ir coa autóctona faba ou co invasor garavanzo, con grelos ou repolo, se admite galiña ou se debe restrinxir ao porco… Pero os contertulios da mesa quitáronlle importancia a estas cuestións, preferiron destacar a necesaria heteroxeneidade dun prato que tradicionalmente se preparaba durante todo o ano. 

Para debater sobre os cocidos sentamos a sete coñecedores da materia, que nos aportaron diferentes perspectivas dende a restauración, a crianza, a divulgación e a administración.

Francisco Bobadilla, exsecretario de Turismo galego e presidente da Federación de Academias de Gastronomía do Camiño de Santiago.

Iván Rodríguez, técnico veterinario da Asociación de Criadores de Raza Porcina Celta (ASOPORCEL).

Alejandro Iglesias, cociñeiro do Restaurante Cabanas de Lalín.

 Lois Celeiro, xornalista e membro da Asociación de Xornalistas e Estudosos do Camiño de Santiago.
 
 Paloma Vázquez,  xefa da área provincial de turismo da Xunta en Lugo. 

Pepe Fontal, cociñeiro do Restaurante Roma de Sarria. 

Juan Luis López, presidente da  Asociación Galega de Turismo Rural (AGATUR).

Pincha nas imaxes para poder ler o contido