O mel é unha das producións máis senlleiras do agro galego. As características específicas do noso territorio, o esforzo e o saber secular dos nosos envasadores logran que este produto teña personalidade propia e unha calidade inigualable. Precisamente, para premiar a súa excelencia, a Consellería do Medio Rural, a través da Axencia Galega da Calidade
Alimentaria (Agacal), en colaboración co Consello Regulador da IXP Mel de Galicia, convoca anualmente esta cata-concurso co obxecto de distinguir e revalorizar o ouro doce da natureza galega.
Santiago de Compostela será testemuña da cata-oficial que se comeza este luns, 14 de novembro, a partir das 09:00 horas, na Cidade da Cultura. Alí, un panel de cata formado por sete expertos será o encargado de valorar os 36 meles acollidos á IXP Mel de Galicia, procedentes de 25 industrias envasadoras, que competirán por erixirse coma as mellores da comunidade neste 2020.
O acto, que estará presidido polo presidente da Agacal, D. José Luis Cabarcos pon en relevo a importancia do rural galego e avoga pola revalorización do traballo e saber facer dos produtores e elaboradores desta comunidade.