O 16 de novembro podrían publicarse as axudas da Xunta a hostalería

 

O presidente da Asociación Provincial de Empresarios de Hostalería e Turismo de Lugo (Apehl), Cheché Real, estivo presente onte nunha mesa de diálogo co vicepresidente primeiro da Xunta de Galicia e conselleiro de Presidencia, Xustiza e Turismo, Alfonso Rueda; a conselleira de Emprego e Igualdade, María Jesús Lorenzana, e a directora de Turismo de Galicia, Nava Castro, para abordar a complexa situación do sector hostaleiro da comunidade e valorar as medidas e axudas necesarias.

Na xuntanza, celebrada no edificio administrativo de San Caetano en Santiago de Compostela, estiveron representantes das asociacións de hostalería de Galicia. Segundo indica Cheché Real, “vanse mobilizar ao redor de 14 millóns de euros e creouse unha mesa de negociación entre a hostalería e a administración para perfilar as axudas”.

A previsión é que estas axudas se publiquen o día 16 de novembro, se tramiten por medio dunha declaración responsable e se poida acceder a elas xa en decembro.

Real resaltou que “todas estas medidas chegan tras as concentracións levadas a cabo nos últimos días, por iso cremos que é moi importante continuar apoiando todas as accións que se organicen. Estar unidos parece a única vía para lograr as nosas reivindicacións e salvar os nosos establecementos”.