A programación completa do Festival de Cine Inclusivo de Vigo incluirá 28 proxeccións no Auditorio do Concello e nos cines Salesianos entre o 13 e o 17 de outubro. Esta edición, que vén marcada pola crise sanitaria xerada polo COVID19, está dedicada aos sanitarios e, por ese motivo, varios dos traballos audiovisuais que se van proxectar serven para dar a coñecer e valorar o traballo dos sanitarios. Ademais, no acto inaugural proxectarase, fóra de concurso, De chaque instant, o último documental de Nicolas Philibert. Este documentalista francés está considerado un dos mellores de Europa e do mundo e tras estar ingresado no hospital e quedar abraiado da dedicación dos sanitarios que o atenderon, filmou De chaque instant sobre a vocación dos enfermeiros. Esta proxección faise en colaboración coa Alliance Française e o Institut française de Vigo.
A pesar de todas as restricións
impostas pola pandemia, este ano o festival crece con novas seccións
competitivas. Por unha parte divídese a parte de documental na sección
VIG-IN-DOC, dentro da que se proxectarán as seguintes longas documentais pola
inclusión: Crip Camp (A Disability Revolution), Midnight Family / Urgencias en
México DF e Ara Malikian: una vida entre las cuerdas; e a sección SHORT-IN DOC de curtas
documentais pola inclusión entre as que están: Carne, Un viaje inesperado,
Woman, Paraíso, Otra forma de caminar i El monstruo invisible. Estas seccións súmanse á SECCIÓN
INCLUSIVE de longametraxes de ficción na que atopamos os seguintes títulos: Nematoma
(Bailando en la niebla), Cuerdas e Remember me. E a sección de curtas de ficción audioescritas e subtituladas. Co
obxectivo de achegar o cine a todas as persoas, as proxeccións incluídas nesta sección serán accesibles para as persoas
con problemas de visión ou audición. A través da aplicación desenrolada por
ONCE AudescMobile, todas as persoas con algún tipo de discapacidade visual
grave poderán acceder a estas proxeccións que terán lugar o sábado 17 a partir
das 18.00 horas no Auditorio do Concello. Este pase tamén será accesible para
as persoas con dificultades auditivas xa que os filmes están subtitulados para
persoas con sordera e haberá intérprete de lingua de signos. As curtas incluídas neste bloque son
as galegas: Homoaquia, Para sempre Malévich
e
Xoves de Comadres, ademais de
Orquesta
Los Bengalas, Operación R.A.E., El método PIGS, There Will be monsters, Loca e
Polter.
Outra das novidades do festival é o concurso de webseries online. Todo o público xa pode ver as cinco series que participan nesta
primeira edición a través da web do festival e votar a súa favorita. No concurso
deste ano participan as webseries Enfermedades raras, Indetectables, Amor
superdotado, #Sitcom e Hasta la vista!. Os directores das
mesmas escolleron un capítulo que xa se pode ver online en: https://www.festivalcinevigo.es/webseries/ Despois de velas, todo
aquel que o desexe pode escoller a súa favorita. O prazo para votar remata o
xoves 16 de outubro ás 23.55 horas. Paralelamente ás proxeccións,
desenvolveranse unha serie de
actividades que pretenden crear conciencia sobre a inclusión no seu aspecto
máis amplo. Manuel Burque, guionista e actor na serie Vida Perfecta creada por
Leticia Dolera, será o encargado de guiar o webinar ‘Vida perfecta e como rachar
moldes’ da sección Coñece! do festival, dirixida a escolas. O sábado 17 ás
12.00 da mañá e de forma telemática terá lugar a Charla con AGAG (Asociación Galega de Guionistas). Baixo o título ‘El último show e a representación da
terceira idade na ficción’. O mesmo día pero ás 16.00 horas, terá lugar a
única actividade presencial do festival, o café con CREA (Asociación Galega de
Profesionais da Dirección e Realización). Os directores Noemí Chantada (La mujer invisible) e Alex Cancelo (Aysha) participarán no coloquio ‘A responsabilidade dos creadores
coa realidade’
A V edición do Festival de Cine
Inclusivo de Vigo volverá celebrase no Auditorio do Concello e nos cines
Salesianos. Dada a actual situación
sanitaria tomaranse todas as medidas precisas (redución de aforo, uso
obrigatorio da máscara, puntos de desinfección a entrada e saída dos auditorios
etc.) para crear un evento seguro.
Por este mesmo motivo, decidiuse pasar ao formato telemático parte das
actividades paralelas ás proxeccións.
A Asociación Galega Audiovisual
Inclusiva (AGAIN) organiza o V Festival Internacional de Cine Inclusivo de
Vigo, co obxectivo de dar a coñecer, apoiar e valorar proxectos
cinematográficos realizados por e para a inclusión, a igualdade e a difusión
universal da sétima arte. O festival non sería
posible sen o patrocinio e colaboración de diferentes Administracións e
entidades privadas.