Ons, a quinta
longametraxe do cineasta compostelán Alfonso
Zarauza, terá a súa premiere mundial no Festival
de Cine Europeo de Sevilla (SEFF), que se
celebra do 6 ao 14 de novembro. Será en Special
Screen, unha nova sección competitiva que
abre este ano o festival con 14 títulos que suman á
súa calidade cinematográfica a vontade de chegar a un
amplo número de espectadores.
Protagonizada por Melania Cruz e Antonio
Durán ‘Morris’, Ons é un drama con
toques de misterio no que un matrimonio en crise, que
trata de salvar a súa relación vivindo unha temporada
na illa de Ons, cruza o seu destino co dunha muller
amnésica que aparece naufragada na praia. Completan o
reparto Xúlio Abonjo, Marta Lado, Anaël Snoek,
Miguel de Lira, Diego Anido, Montse Martínez e Cris
Iglesias.
Trátase da quinta longametraxe de Alfonso Zarauza, un
dos cineastas galegos máis sólidos e experimentados,
tras A noite que deixou de chover (2008),
Encallados (2013), Os fenómenos
(2014) e A viaxe dos Chévere
(2014). O director compostelán presenta con Ons
un filme de madurez, intimista e cunha profunda
mirada autoral, no que destaca tanto o que non se
conta como o que se conta, ademais da paisaxe agreste
de Ons como escenario da intemperie emocional dos seus
protagonistas.
O filme foi rodado por enteiro na illa de Ons no
outono de 2019 e conta cun equipo artístico e técnico
100% galego liderado por Alfonso Zarauza -que
ademais asina o guion canda Jaione Camborda-
con talentos coma o de Alberte Branco na
dirección de fotografía, Elia Robles na
dirección de arte, Sérgio Silva e David
Machado na dirección de son ou Xavi Font na
produción executiva. A banda sonora contén temas dos
grupos Chicharrón e Leilía.
Ons está coproducida por Maruxiña Film Company
(Galicia) e Bando à Parte (Portugal) e conta
coa participación da Televisión de Galicia (TVG)
e da Rádio e Televisão de Portugal (RTP),
con subvención de Agadic e coa colaboración da
Deputación de Pontevedra.
‘Special Screen’, nova sección
competitiva do SEFF
A sección Special Screen, na que
compite Ons, é unha das grandes novidades da
17ª edición do Festival de Sevilla. Nela participan
catorce títulos que destacan pola súa vontade de
chegar ao gran público e por combinaren narrativas
íntimas e precisas con historias humanas e personaxes
que deixan pegada. Nesta edición preséntanse catorce
longametraxes de países como Reino Unido, Bélxica,
Francia, Irlanda ou Dinamarca, e será a votación do
público a que decida este novo premio, dotado con
10.000 euros.
Coa súa premiere no SEFF a longametraxe Ons arranca
o seu percorrido en festivais e o camiño cara á estrea
en salas comerciais, prevista para comezos de 2021.