Lugo segue dándolle voltas á forma de adaptar a celebración do San Froilán deste ano, que dependerá en gran medida "da evolución da situación sanitaria e dos cambios que poida sufrir até o inicio das festas", pero en todo caso contan con poder celebrar unha versión adaptada que "siga mantendo a esencia da gran festa do outono galego".
O San Froilán 2020 contará cun total de 6 escenarios, con recintos acotados e cadeiras para o público. “En total serán máis de 1.000 persoas as que cada día poderán entrar aos distintos concertos”, anunciou Maite Ferreiro, concelleira de Cultura, que engadiu “en cada un dos 6 recintos haberá espazo suficiente para que todas as persoas poidan gardar 1,5 metros de distancia de seguridade ao seu redor”. Os seis escenarios, situados no Paseo Fluvial do Miño, e nas prazas do Castiñeiro, Augas Férreas, Agro do Rolo, Camiño Primitivo e Horta do Seminario, “máis de 9.000 metros cadrados de espazo destinado aos concertos que se celebrarán cada día simultaneamente en cada praza, para evitar aglomeracións”.
Os grupos locais formarán o groso das actuacións que, xunto con pequenos formatos de outros puntos da Galiza, realizarán un concerto diario, en sesión de tarde, en cada un dos recintos durante a semana e dous nos días festivos e fin de semana, coa sesión vermú. O recinto histórico e distintos puntos da cidade acollerán tamén concertos itinerantes para evitar concentracións de xente e manter o espírito da festa.
Maite Ferreiro anunciou que está en marcha a renovación do prego da iluminación das festas. “Debido ao cambio de formato nas festas tamén se realizarán cambios no alumeado para adaptalo á realidade na que nos atopamos”, declarou a edil de Cultura, que engadiu “nos vindeiros días resolverase tamén o concurso do cartaz das festas”.
O patio do Seminario Menor acollerá un ano máis do San Froilán Miúdo adaptando o espazo para que as familias poidan desfrutar de maneira segura aos 13 espectáculos de teatro, circo, maxia e música. Ademais, Maite Ferreiro anunciou que se manterán actividades “consolidadas na celebración das festas, que serán adaptadas á nova realidade”. A Verbena Galega de Antes, o Desfile de Gando, o XVII Festival de Cultura Tradicional de Cántigas e Frores, a XXII Mostra de Música Tradicional Galega do Domingo das Mozas, Cultura e Tradición no Camiño, Sanfroidance e o espazo Hip Hop terán o seu espazo no programa das festas. Ademais, Maite Ferreiro afirmou que “os Pelúdez estarán presentes nesta edición para manter viva a esencia da gran festa do outono galego”