Chega este ano co éxito anticipado de ter logrado manterse no calendario mentres moitas outras se suspenden por mor da pandemia de covid19 a Epic Race 2020, na edición máis complicada dende que esta proba botou a rodar hai catro anos, A carreira, patrocinada pola Deputación de Pontevedra, foi presentada por Jose Víctor Cimadevila, director da empresa organizadora Global DxT, e pola presidenta, Carmela Silva, quen a definiu como "un escaparate turístico e deportivo da provincia" e valorou, dun xeito moi especial, o gran esforzo de organización que implica a súa celebración, nestas circunstancias, durante a fin de semana dos próximos sábado, día 12, e domingo, día 13.
Carmela Silva amosouse "moi satisfeita e tamén emocionada" de que tivera sido posible aplicar o estrito protocolo anticovid19 da Federación Galega de Ciclismo (que vai xa pola terceira revisión) e a normativa sanitaria "superando tódalas dúbidas e obstáculos". Despois de expresar a súa felicitación á empresa organizadora Global DxT polo rigoroso traballo realizado vaticinou que, en moi pouco tempo, a Epic Race será non só unha referencia en Galicia, senón tamén en España. Ao acto de presentación asistiron tamén o tenente de alcalde pontevedrés, Agustín Fernández; o alcalde de Ponte Caldelas, Andrés Díaz; o concelleiro de Portas, Alfonso Vazquez; e o deputado de Deportes, Gorka Gómez. "O virus non vai impedir que na provincia de Pontevedra teñamos actividades para que a xente sexa feliz; imos ser moi responsables, respectando tódalas medidas de precaución, pero non imos parar esta provincia", proclamou a presidenta antes de explicar o exhaustivo dispositivo de seguridade que acompañará á carreira. Deste xeito, lembrou, prescríbese o uso da máscara e o distanciamento físico nas zonas de recollida de dorsais, avituallamento e liña de meta, obriga de desinfectar superficies e utensilios, separación dos caixóns do podio, prohibición de compartir alimentos ou bebidas ou a sinatura dunha declaración responsable por parte de tódalas persoas participantes, entre máis dunha vintena de regras recollidas no protocolo.
José Víctor Cimadevila, máximo responsable da Organización, definiu a Epic Race como "deporte seguro, ao aire libre e ao alcance tanto dos deportistas profesionais como dos ciclistas de fin de semana, que teñen a opción de anotarse en equipos e completala perfectamente no tempo establecido". O director adiantou que a suspensión de moitas carreiras fixo posible que este ano se teñan anotado deportistas de elite como o "Triki" Beltrán, Paco Mancebo, Juan Pablo Trujillo, Brandán Márquez ou Tiago Silva, ademais de Lara Lois, a ciclista do Grove campioa de España de Maratón e Ultramaratón. "Temos unha primeira liña de saída espectacular, o mellor do mellor", subliñou. Ademais, non esqueceu a crecente presencia feminina, tanto nas distancias de 300 como 200 Km e, máis aínda, en modalidade individual. Cimadevila explicou que "sacar a proba adiante este ano foi moi difícil; custou 10 veces máis que un ano normal, pero se conseguimos superar isto, xa podemos dicir que a Epic Race está arriba".
A proba dispútase nun formato "non stop" nas distancias de 300 ou 200 Km, que poden cubrirse de maneira individual ou por equipos de 2 ou 3 persoas. O tempo para completar os percorridos é de 28 horas e 19 horas, respectivamente. Ao longo do seu percorrido, día e noite, percorre os concellos de Pontevedra (saída e chegada), Meis, Moraña, Poio, Ponte Caldelas, Cerdedo-Cotobade, Fornelos de Montes, Soutomaior, Pazos de Borbén, Ponteareas, Mos, Redondela, Vilaboa, Barro, Portas, Caldas de Reis e Cuntis. En palabras de Carmela Silva "desfrutando montes, acariciando rías, adentrándose en bosques antigos e coñecendo pobos fermosos".
O tenente de alcalde de Pontevedra, Agustín Fernández, subliñou o valor de apostar por "eventos deportivos propios", que atraen xente, crean actividade económica e dan a coñecer a nosa provincia. Alfonso Vázquez desde Portas subliñou a satisfacción de poder manter a proba nun ano tan complicado e anunciou a vontade de Portas de participar en cantos eventos contribúan á práctica do deporte ao aire libre e en contacto coa Natureza. Andrés Díaz destacou o "pedigrí" de Ponte Caldelas no "mountain bike", pois leva xa moitos anos organizando a súa BTTroita e agradeceu á Deputación que a inclúa no percorrido da Epic. Todos eles subliñaron o carácter colaborativo da Epic Race, "un proxecto que suma", como resumiu Carmela Silva. A presidenta da Deputación, que animou a todas as persoas afeccionadas ao mundo do pedal a anotarse para facer deporte polo "escaparate" das Rías Baixas, concluíu cun novo recoñecemento: "Aplaudo a intelixencia e o talento que supón ter aproveitado a oportunidade provocada pola covid19 para traer a figuras que este ano non estarán noutras probas; imos convertelas en embaixadores e embaixadoras da nosa provincia e da Epic Race".