Entre o xoves e o sábado desta semana celebrarase en Santiago a quinta edición do festival HerDanza, convertendo o parque de Bonaval e o CGAC en escenario para espectáculos de danza , conversas e proxeccións audiovisuais, ofrecendo un punto de encontro para artistas e entidades do sector cultural, contribuindo a establecer redes que adoitan resultar tan enriquecedoras para os creadores como para os espectadores que asistan aos espectáculos.
O programa arrincará o xoves cunha conversa sobre o tradicional e o contemporáneo na danza, ás 17 horas no CGAC, e ese mesmo día, ás 19 horas, o parque de Bonaval será escenario de tres propostas artísticas da man de Daniel Rodríguez, Abdiel Vargas, Yaimelys Robaina, Marta Cuba e Remedios Cuba.
O venres 4 ás 17h poderase asistir ao espectáculo froito da residencia do coreógrafo Mikel Aristegui no CGAC, baixo o título 'Ouveo', e un posterior coloquio co artista. Ás 19 horas, de novo tres propostas de danza a cargo de Wacking do Fiandón, Milagros Bordones e a Cía Mai.
O sábado 5 péchase o festival con tres propostas: ás 12:30h o visionado do filme 'Polina' no CGAC; ás 17h a presentación do libro 'O público está aquí'; e ás 19 h danza en Bonaval con Xián Martínez, Clara Ferrao e Leodan Rodríguez.
O aforo de cada evento está limitado a un total de sesenta persoas, para poder garantir as distancias de seguridade. A entrada é gratuíta, e o público deberá asistir con media hora de antelación ao recinto, e seguir as indicacións do persoal de acomodación.