A bodega Marqués de Vizhoja, situada en Arbo e englobada dentro da D.O. Rías Baixas, escenificou esta mañá as medidas de seguridade sanitaria que deberán tomarse este ano para evitar contaxios durante os traballos da vendima, que en principio deberían arrancar para comezos de setembro.
Como principal novidade, os traballadores non poderán traballar por parellas como acostuman, repartíndose as dúas caras da mesma viña. Este método tradicional de vendima eliminarase para garantir a distancia de seguridade, tendo que encargarse un mesmo operario das dúas caras de cada liña de viñas.
Ademais, a vendima terá que cumprir cunha serie de normas entre as que se atopan o uso da máscara en todo momento, o control de entrada á adega e medición da temperatura, poñer a disposición dos e das traballadoras hidroxel, máscaras e papeleiras, evitar o contacto de mans coa cara, redución do contacto físico e distancia mínima de dous metros, non compartir obxectos persoais e non facer reunións. Tamén se recomenda lavar a roupa despois de cada xornada de traballo, evitar beber auga en fontes ou lugares de tránsito común, e tanto a entrada como a saída da adega farase de forma escalonada e mantendo en todo momento a distancia de seguridade. Ademais, introduciuse un sistema de sinalización con balizas para que cada vendimador/a saiba ata onde ten que ir e evitar a concentración de varias persoas nun mesmo punto.
Na escenificación desta mañá participaron o alcalde de Arbo, Horacio Gil, e o deputado provincial Carlos Font, que puxo en valor esta “demostración dos novos tempos nos que estamos e as medidas que se teñen que tomar” e cualificou como “unha situación sobresaínte poder comprobar in situ como se vai desenvolver unha vendima que será especial este ano”. Carlos Font asegurou marchar “coa satisfacción de saber que a economía se reactiva e que algo tan tradicional como a vendima vai contar con todas as medidas de seguridade”.