![](https://blogger.googleusercontent.com/img/b/R29vZ2xl/AVvXsEjjICBlkKC821pQkmXjMybOrpcjuzhC4TPR07nQIqOlqyc7bOUexa8iwnFDy2_yBn58aTTkoZDFvX3JSLCnuGqPA8Jirw6p1t1airn32h85Rv99BlQMfQYbHwZrDsWbWY10S68zM99z9iA/s320/orzan.png)
Unha gran festa que este ano non poderá celebrarse, pero que para algúns podería resultar unha tentación demasiado grande. Por iso o concello ten preparado un rigoroso dispositivo de seguridade, pechando as praias dende as nove da noite e controlando os accesos pola tarde para impedir que as persoas baixen obxectos relacionados coas cacharelas.
O outro dispositivo especial de emerxencia abarcará todos os barrios da cidade para controlar que se cumpran as instrucións descritas no bando municipal e a normativa de prevención da COVID-19. Ademais, os servizos de emerxencia municipais e de Protección Civil revisarán todas as grelladas que teñen autorización por parte do concello. Ata o momento, recibíronse case 300 declaracións responsables de locais de hostalaría e de persoas físicas para realizar churrascadas e sardiñadas na vía pública.
O dispositivo de emerxencia estará formado por preto de 200 persoas, polo que se mantén o número de efectivos das forzas de seguridade municipais pero suprímese o persoal dedicado á asistencia nas praias durante a festa do San Xoán do ano pasado, como é o cadro de persoal da Cruz Vermella, os servizos sanitarios e de emerxencias, 061, o persoal das carpas, profesionais de rescate acuático e socorristas nocturnos.