O peche de fronteiras na raia seca galaico-portuguesa (agás o de Feces de Abaixo, entre Verín e Chaves) está a ter graves consecuencias “económicas, sociáis, familiares e de confianza”, segundo manifesta o director da Eurocidade Chaves-Verín, AECT, Pablo Rivera. Nunha entrevista concedida a Hggtonline.com subliña que “é a primeira vez que vivimos un peche de fronteiras tan prolongado no tempo e isto está a levantar un muro entre pobos cunha gran interrelación histórica”.
-A vida en común foi a tónica histórica entre os habitantes da raia seca, o maior tramo fronteirizo ibérico e integramente na provincia de Ourense, ¿como se está a vivier esta situación?
-É unha situación complexa, xa non falamos só da vertente socio-económica, tamén afectou á vida cotiá das familias. Os habitantes da raia están afeitos a vivir e traballar nunha fronteira permeable, onde a vida das persoas e empresas desenvólvese a ambos os dous lados, e onde os cidadáns convértense en eurociudadáns. Por exemplo, aos de Oimbra queda máis preto Chaves que Verín e fan as súas compras na vila portuguesa e tamén os portugueses veñen encher combustible a Galicia e a comprar produtos hixiénicos que son máis baratos. Hai xente de ambas as partes que para ir ao traballo ten que percorrer máis de 100 quilómetros, xente de Montalegre que traballa en Xinzo e que ten que vir ata Verín e logo baixar ata a capital da Limia… peo en Lisboa e Madrid isto sóalles a chinés, non conscientes da realidade e dos fluxos que aquí se producen, e iso que nesta zona a incidencia do Covid 19 foi mínima.
-A nivel turístico, ¿como está a afectar esta situación á Eurcidade Chaves-Verín?
-Xa te podes imaxinar. Somos un destino que fai promoción conxunta baixo a marca “ Eurocidade de Auga”, que dispoñemos de 3.200 camas hostaleiras, máis que toda a provincia de Ourense no seu conxunto, cunha ampla oferta termal, con viños amparados pola D.O. Monterrei e a portuguesa Tras-Os-Montes, con 7 plantas embotelladoras de auga mineral. Con pouca industria, a nosa gran fortaleza está no sector servizos, especialmente no turismo. Facemos promoción conxunta, ofertamos paquetes turísticos conxuntos, somos un destino potente, que estaba a ter un importante crecemento, e de súpeto viuse freado.
-¿Tedes definida algunha estratexia para potenciar o destino a curto prazo?
-Estamos a traballar niso pensando no turismo de proximidade inicialmente. A estratexia é fomentar a idea que que o que nos visite quede máis tempo; que unha familia que veña ao Parador de Verín cruce a fronteira e achéguese ata as termas portuguesas, ou ao campo de golf de Vidago, que coma nun lado e cee en outro… que alongue a estancia.
-A AECT Río Minho mantivo recentemente unha entrevista co Delegado do Goberno en Galicia para solicitar a apertura das fronteiras miñotas e iso parece que creou algún malestar na Eurocidade Chaves-Verín…
-En absoluto. Esa foi a interpretación que quixo darlle un determinado medio de comunicación. A AECT Río MInho está no seu pleno dereito de solicitar entrevistas con quen queira; é máis, mantemos unha gran relación.
-Teño entendido que os alcaldes/presidentes das Eurociudades Ibéricas acordaron elaborar un manifesto conxunto reclamando o seu status quo transfronteirizo ante os gobernos de España e Portugal?
-Efectivamente. Xurdiu a raíz do webinar organizado desde a Eurocidade Chaves-Verín e foi a primeira que vez que todos os alcaldes/presidentes das sete eurociudades ibéricas (Cerveira-Tomiño, Tui-Valencia, Salvaterra- Monçao, Chaves- Verin, Elvas-Badaxoz, Ciudad Rodrigo-Fuentes de Oñoro-Almeida-Vilar Formoso e Eurociudad do Guadiana) reúnense nun mesmo foro; que á súa vez fose virtual e que se produciu nun momento tan especial e excepcional como o que estamos a vivir, non fai máis que reforzar o papel das Eurocidades como divulgadores dos problemas que afectan á cooperación de proximidade na Peninsula Ibérica”.
-Que lle trasladastes aos gobernos de España e Portugal nese manifesto?
-Resumindo, que procedan á apertura de pasos fronteirizos ou, no seu caso, decreten a libre circulación da cidadanía das Eurociudades da fronteira Hispano-Lusa entre os núcleos poboacionais que conforman cada unha delas; e, ademais dos preceptivos protocolos, vías de financiamento á Unión Europea e aos Estados, ben a través do Programa Operativo de Cooperación Transfronteiriza España-Portugal 2014-2020 ou mediante a constución de ITIs (Investimentos Territoriais Integrados) transfronteirizas para paliar o impacto económico producido pola crise do COVID-19 e dar apoio aos axentes locais e económicos das Eurociudades.