Galicia contará cun modelo propio que permita elevar os estándares de seguridade sanitaria por riba da media, apostando na saída da crise pola calidade como elemento diferenciador. Así o avanzou hoxe o conselleiro de Cultura e Turismo, Román Rodríguez, durante a súa comparecencia na Deputación Permanente para informar sobre o Plan de Reactivación do sectores cultural e turístico fronte aos efectos derivados da crise do COVID-19 aprobado no Consello da Xunta, unha folla de ruta que contempla preto de 50 medidas cunha dotación de 27 millóns de euros para favorecer a recuperación destas dúas industrias ao longo dos vindeiros meses.
Durante a súa intervención, o titular de Cultura e Turismo destacou que garantir a confianza e a seguridade dos potenciais visitantes é fundamental para a recuperación do sector turístico. “Galicia, destino seguro é moito máis que un lema. É unha obriga e unha responsabilidade compartida entre o sector empresarial e as administracións”, puntualizou. Neste sentido, considerou que a resposta do Goberno central nesta materia foi “insuficiente”, ao limitarse a publicar o sábado no Boletín Oficial do Estado (BOE) unha serie de ordes con indicacións xenéricas para as diferentes áreas do turismo, e o propio domingo, un día antes da reapertura, unhas guías con recomendacións específicas para cada actividade.
Segundo Román Rodríguez este sistema pode xerar desigualdades entre establecementos e promove un sector “a dúas velocidades” que debilita a Galicia como destino. Así pois, explicou que a Xunta acordará co sector establecer protocolos consensuados que poidan ser asumidos pola totalidade dos establecementos, xerando desta maneira confianza entre traballadores e usuarios. O Goberno galego acompañará este proceso cun investimento de 5M€ a través do programa Galicia, destino seguro, que recolle axudas públicas e formación para os negocios que precisen acometer actuacións que se deriven da súa aplicación.
Apostar polo “turismo de autor”
O conselleiro de Cultura e Turismo aclarou que a folla de ruta elaborada pola Xunta para a reactivación do sector turístico contempla un total de 24 iniciativas, dotadas con ata 11M€, enmarcadas en catro eixos de actuación. O primeiro deles céntrase na posta en marcha de accións de promoción e de activación da demanda, impulsando Galicia como un destino caracterizado por valores como a seguridade, a saúde ou a sustentabilidade e no que tamén se apostará por tecer sinerxías entre a nosa Comunidade e o norte de Portugal.
Neste ámbito recóllense proxectos como o impulso de Galicia como destino para o turismo de congresos adaptado á nova realidade. Co obxectivo de financiar preto de 50 eventos no último cuadrimestre do ano, a Xunta publicará mañá mesmo unha orde de ampliación de prazos dotada con 500.000 euros. O segundo eixo de actuación, subliñou Román Rodríguez, pasa pola creación de novos produtos turísticos da man de axentes como os xeodestinos, potenciando o turismo local, ou a sinatura de acordos coas diferentes entidades sectoriais para adaptar toda a cadea de valor do sector á evolución do mercado.
O terceiro vector do plan contempla medidas de apoio ao sector empresarial e ao mantemento do emprego turístico a través de accións como o programa Queda en Galicia, polo que se cubrirán os gastos derivados do financiamento dos produtos mercados en axencias de viaxes e se priorizará o turismo local e de proximidade, ou o Bono solidario, que gratificará con paquetes turísticos en Galicia aos profesionais autonómicos vinculados á loita contra o coronavirus. Por último, o cuarto eixo pasa por reforzar a formación e a mellora da competitividade dos negocios, ampliando o Plan de teleformación a cargo do Centro Superior de Hostalaría de Galicia (CSHG), no que xa participaron máis de 3.000 persoas durante o estado de alarma, ou implementando un sistema de asesoramento e consulta.
“É un plan que aposta polo turismo de autor, por un modelo propio”, resumiu o conselleiro, que salientou a importancia de “apostar polo detalle, a calidade e a confianza do destino”, tal e como vimos facendo coa nosa capacidade de acollida no Camiño de Santiago.
Bono cultural compartido
No que atinxe ao eido cultural, Román Rodríguez destacou que o plan recolle un total de once medidas dotadas con máis de 10M€ enmarcadas, igualmente, en catro eixos de actuación. O primeiro deles, explicou, baséase na activación de todas as industrias culturais a través de distintas liñas de apoio para sectores como o do libro e as bibliotecas, cunha dotación de máis de 2,3M€, o sector audiovisual, por máis de 4M€, as artes escénicas, cun investimento de 1,8M€, así como accións centradas na música ou as artes plásticas.
O segundo eixo céntrase no mantemento do emprego cultural na Comunidade a través da creación dun fondo de proxectos e iniciativas culturais que priorice o mantemento do tecido empresarial ou a reprogramación das actividades. En paralelo, apostarase polo fomento do consumo a través dunha campaña de sensibilización dirixida a toda a sociedade galega ou mediante a creación dun bono cultural. Precisamente, o titular de Cultura da Xunta lamentou a “negativa e desinterese” do Goberno central a participar nesta iniciativa, tal e como Galicia propuxo ao ministro de Cultura y Deportes, polo que buscará a complicidade das deputacións e concellos da Comunidade para a súa posta en marcha conxunta.
O cuarto eixo de actuación baséase no desenvolvemento de medidas de formación, profesionalización e mellora da competitividade a través dun servizo de consultoría en liña ou mediante un plan de formación no eido cultural dotado con preto de 600.000 euros. “Buscamos protexer e apoiar toda a cadea de valor da produción cultural, fomentar a creación de novas tipoloxías e formatos adaptados ao novo escenario e apostar pola formación e a innovación como piares do sector”, enfatizou Román Rodríguez.
Neste sentido, lembrou que esta estratexia “xorde de escoitar a centos de profesionais que nos achegaron os seus problemas e necesidades” e aos que seguirá dando resposta. Ademais, Román Rodríguez aclarou que o plan está conformado por unha batería de medidas orientadas ás singularidades destes sectores, que se complementan coas medidas transversais en marcha ou previstas pola Xunta para o resto de segmentos económicos de índole laboral, fiscal e financeira, aos que xa están accedendo empresas e traballadores destes ámbitos.
O Xacobeo máis galego da historia
O titular de Cultura e Turismo destacou que o plan se completa con doce medidas centradas na celebración do Xacobeo 2021, por máis de 5,6M€, con incidencia tanto no eido cultural como o turístico. Entre elas, anunciou a activación nas próximas semanas dun fondo de proxectos que inxectará liquidez inmediata nas industrias culturais da Comunidade e que contemplará axudas de ata 10.000 euros para a posta en marcha de proxectos dixitais ou presenciais. Do mesmo xeito, fomentarase a compra de obras de artistas galegos e impulsaranse accións no eido musical como unha convocatoria de proxectos para este sector por máis de 1M€ ou o apoio aos ciclos musicais do Xacobeo ou FEST Galicia.
Román Rodríguez subliñou a importancia deste evento no contexto actual e apuntou que tras a crise sanitaria provocada polo coronavirus, o éxito do vindeiro Ano Santo “pasa por un só obxectivo: a recuperación económica de Galicia”. Para acadalo, avanzou que a Xunta traballa en construír “un novo Xacobeo, o máis galego da nosa historia sen renunciar ao seu espírito de universalidade”, que exerza como motor económico dos sectores cultural e turismo, pero tamén como unha oportunidade para a promoción e posta en valor da nosa Comunidade no exterior. Neste sentido, invitou a todas as forzas políticas a sumar esforzos para facer deste evento “unha oportunidade única para a recuperación de Galicia”.
Agradecemento aos profesionais
Durante a súa intervención, o titular de Cultura e Turismo avanzou que a previsión da Xunta é que xa neste mesmo mes se poidan poñer en marcha as primeiras medidas deste plan, abrindo as primeiras convocatorias e asinando os primeiros convenios. Lembrou que esta folla de ruta é froito da colaboración cos distintos do sector aínda que, resaltou, este clima de cooperación “non pode rematar coa aprobación do plan”. Recordou que a recuperación da cultura e o turismo galego “é un desafío compartido” ao tratarse de dous sectores estratéxicos que representan o 13% do PIB galego e máis de 150.000 postos de traballo.
Deste xeito, subliñou que é máis necesario que nunca buscar liñas de actuación conxuntas entre as distintas administracións que permitan evitar duplicidades, crear sinerxías e concentrar o esforzo económico no impulso do tecido produtivo e o mantemento do emprego no eido cultural e turístico. Precisamente, o conselleiro quixo agradecer durante a súa comparecencia o esforzo dos profesionais destes dous sectores nas últimas semanas. “Son moitas as persoas e colectivos que demostraron que Galicia estivo á altura”, valorou.