Medio Rural merca 100 tm de patacas para o Banco de Alimentos de Lugo

A Consellería do Medio Rural vén de mercar un total de 100 toneladas de patacas para cederlle ao Banco de Alimentos de Lugo, co fin de que poidan desde alí repartir este produto alimentario ás familias que así o precisen mediante as sedes de Cáritas de toda España. Ademais desta cantidade, o un produtor da Asociación de Empresarios, Gandeiros e Agricultores da Limia (Adegal), que cedeu outras 30 toneladas para esta causa. 

A Consellería mercou este produto a través da nova canle de comercialización Mercaproximidade, co fin de apoiar o sector primario galego nesta situación de emerxencia sanitaria debido ao Covid-19. Deste xeito, o Goberno galego non só lle dá saída aos excedentes dos pequenos agricultores e gandeiros da nosa comunidade, senón que tamén contribúe a minimizar a perda de ingresos que poidan ter estes produtores debido ao peche das súas canles habituais de comercialización. 

A Xunta mercou nas últimas datas alimentos tales como carne, queixos, mel e mesmo patacas que foron tamén cedidas a entidades e comedores sociais con este mesmo fin. Esta actuación excepcional vén contemplada na orde impulsada pola Consellería, e publicada no Diario Oficial de Galicia o pasado 14 de abril, onde se especifica que a Xunta poderá mercar produtos de primeira necesidade a aqueles produtores que están tendo problemas para dar saída aos seus produtos, provocado fundamentalmente polo peche da hostalaría, da restauración e dos mercados tradicionais de proximidade.