A Feira do Viño de Amandi, que se celebra todos os anos coincidindo co Domingo de Ramos, nesta súa cuadraxéxima edición, cambiara de datas pola coincidencia coas tamén aplazadas eleccións autonómicas, e debería celebrarse esta fin de semana. Algo que non vai suceder por mor do Estado de Alarma pero nós dende aquí animamos a descorchar botella dun Ribeira Sacra da subzona de Amandi para acompañar as comidas ou ceas desta fin de semana.
Postos en contacto co alcalde de Sober, Luis Fernández, indicou en relación á posibilidade de celebrala noutras datas máis adiente que “fixar unha data aogra mesmo é perder o tempo. A miña intención, se a situación o permite, é facela coincidir coa Festa da Rosca que se celebra en agosto. O que está claro é que, sexa presencial ou telemáticamente, algo imos facer”.
Declarada Festa de Interese Turístico Galego en 1999, na súa cuadraxésima edición ía ter como pregoieira a Benedicta Sánchez, mellor actriz revelación nos Premios Goya polo seu papel na película “Lo que arde”.
A feira en si é unha especie de túnel do viño en ambiente festivo, pois no recinto que se instala para a ocasión na Praza do Concello ademais dos postos das adegas non falta a música, a animación e postos de produtos gastronómicos da zona e de artesanía, que ten na olería de Gundivós unha das súas máximas expresións.
Amandi, con 38 adegas, é unha das 5 subzonas da D.O. Ribeira Sacra, expoñente da denominada viticultura heroica na ribeira norte do río Sil, en territorio lugués, onde se producen viños que teñen na Mencía e no Godello as variedades principais.