Os impulsores do Camiño dos Faros, ruta de senderismo de 200 quilómetros que une Malpica con Fisterra pola beira do mar, decidiron cancelar para este 2020 a multitudinaria edición por etapas coa que cada ano reunían a centos de persoas camiñando ao compás para reivindicar esta espectacular ruta costeira.
Consideran que o camiño está consolidado, con miles de visitantes de todo o mundo que coñecen a ruta e acoden a percorrela. Pero confésanse "cansos e aburridos" de facer de políticos e loitar para conseguir a homologación como ruta de sendeirismo de gran recorrido, denunciando que semella imposible que "as administracións (de todas as cores) consideren que é unha ruta de sendeirismo para mellorar a súa sinalización e mantelo limpo todo o ano".
Tras 7 anos de traballo dende a asociación, consideran que se está perdendo tempo para dar unha base sólida a este recurso mentres outros destinos de sendeirismo se están a posicionar perfectamente, citando a portuguesa Rota Vicentina de Portugal como exemplo.
Aínda así, comprométense a seguir traballando para que a ruta quede como está e sexa desnaturalizada/corrompida o menos posible: "seguiremos loitando, con ou sen homologación, con ou sen axuda das Administracións, coma fixemos sempre".
Ademais, que non se organice ruta conxunta non significa que o Camiño dos Faros desapareza. Animan á sociedade a seguir acudindo en asociación, familia ou con amigos para entre todos seguir "mostrándolle ao mundo que esto é máis que un camiño".