A cidade de Pontevedra acollerá esta fin de semana por segundo ano consecutivo o Campionato de España de Ciclocrós e o dato de participación non so superará ao do 2019, senón que é a cifra máis alta na historia da gran cita estatal desta modalidade. No circuíto da Illa das Esculturas rodarán preto dun milleiro de corredores.
Este éxito de inscritos reafirma a aposta das institucións para situar a Pontevedra como un referente do ciclocrós mundial. O alcalde Miguel Anxo Fernández Lores confirmou na presentación celebrada este xoves no Concello que a meta é organizar “unha proba da Copa do Mundo” e posteriormente aspirar ao Mundial.