Todo proxecto nace cunha vocación de transcendencia, no tempo e na sociedade que o recibe. Do contrario habería que chamarlle doutro xeito, un lance para buscarse a vida e quedar a velas vir, fórmula que se multiplica por certo mediante as facilidades que permiten as redes sociais, sen esixencias inversoras nin riscos de tipo económico, inda que cada vez sexa, asemade, máis estreito treito diferenciador, pois as prácticas de corta e pega unidas ás de tragar todo e pórse decúbito prono para sobrevivir… alcanza tamén a soportes impresos.
Disquisición previa que xorde espontaneamente ao analizar a resistencia no tempo, ao valorar a mirada con ampla perspectiva sobre o camiño andado..., superado o rubicón dos 25 anos. Vimos suliñando algunhas destas observacións desde que nos aproximamos ao cuarto de século, desde aquel verán de 1995 no que -inicialmente só unha tímida Hostalería Galega- chegaba aos subsectores intersectoriais que conflúen no noso eixe -a propia hostalería como principal demandador de bens e servizos, turismo, industria de equipamentos e produtos alimentarios, fornecedores desa demanda- como unha turista na propia terra con vocación de reafirmarse.
Así pois, a Gala que acabamos de celebrar, constituía dalgún xeito unha proba. A nosa pregunta máis íntima era, ten HGg&T tanta resposta vital e participativa nos axentes económicos e sociais, como acredita súa difusión certa na intersectorial? A esta razoable, que non temerosa, incógnita, había que anotarlle o risco derivado dese parénteses por responsabilidade cos sectores e a crise económica pasada, i era que cinco anos son moitos cando se trata da conexión entre empresas e axentes socioeconómicos, tal é o rexistro de cambio de titularidades, relevos nas responsabilidades directivas, cambios nas administracións…
Entendede xa que logo queridos amigos, abenzoados lectores, que á formalidade que nos impomos habitualmente nas portadas, engadamos esta vez unha pequena licencia entre interxeccións. Seguides aí, atentos e adeptos a ese lugar común que se chama HGg&T, dispostos a respondernos afirmativamente se desde este modesto equipo que facemos a revista vos dicimos “ven”, a gozar con nós do noso cumpleanos, entendemos que tamén do que significa HGg&T, e de que valorades o noso humilde pero profesional tabloide como punto de encontro intersectorial de referencia. Grazas por vir, grazas por estar aí ano tras ano. Que aquí seguimos, amigos, para servir.