A Deputación de Lugo acaba de comprometerse a impulsar unha explotación de porco celta nas instalacións da da Granxa Gayoso Castro, a través dun convenio de colaboración coa Asociación de Criadores de Gando Porcino Celta –ASOPORCEL- e o Campus Terra que se firmaría durante a primeira metade do 2020.
O seu presidente, José Tomé, ratificou este compromiso no marco da III Xornada Técnica Monográfica sobre esta raza que organiza ASOPORCEL, asegurando que as instalacións funcionarán como centro de reprodución e mellora xenética de animais, proverá aos produtores da provincia de novos exemplares e servirá tamén para a transferencia de coñecementos sobre a raza, grazas aos proxectos que desenvolva o Campus Terra e que se poñerán a disposición do sector.
Na Granxa Gayoso Castro, a Deputación leva tempo colaborando con éxito coa Universidade e cos gandeiros para impulsar o sector leiteiro. Con esta nova iniciativa, a entidade provincial estenderá este modelo de éxito tamén ao sector porcino, co fin de impulsar a cría e a comercialización do porco celta, un produto de calidade que cotiza á alza.
O Presidente puxo neste senso en valor o traballo da Asociación de Criadores de Gando Porcino Celta, que ten nas xornadas técnicas celebradas no Pazo de Feiras “só unha representación do amplo labor que desenvolve en favor do impulso e a profesionalización da cría de Porco Celta e da comercialización dos seus produtos derivados”. “Non hai tanto que esta raza quedou relegada por mor da gandería intensiva e a mecanización, que case acaban con ela. Hoxe estamos na tendencia contraria, e no auxe que está a vivir esta actividade gandeira, ten moito que ver o papel de ASOPORCEL”, destacou José Tomé.
O mandatario provincial asegurou que a recuperación do porco celta “vai aparellada á recuperación da biodiversidade, á mellora da xestión do territorio, contribuíndo á prevención de incendios, e tamén á creación de emprego e, con elo, ao asentamento da poboación no rural”. De feito, recalcou, “a demanda cada vez máis alta deste produto no mercado abre posibilidades reais á xente nova de atopar traballo e desenvolver o seu proxecto de vida no rural”.