O pleno da Deputación da Coruña aprobou por unanimidade unha achega de 75.000 euros para financiar a actividade do Museo da Construción Naval de Ferrol (Exponav) entre o 1 de agosto e o 31 de decembro de 2019. Con estes fondos financiarase os servizos de guías e atención aos visitantes, mantemento e limpeza do inmoble, organización de exposicións e eventos ou adquisición de novo material expositivo, entre outras cuestións.
A Deputación financia con 125.000 euros anuais a actividade deste centro museístico, único en España nas súas características, dedicado a divulgar a importancia social e económica que a actividade da construción naval ten e tivo ao longo da historia para a comarca ferrolá, pero os convenios abarcaban dúas anualidades ao comezar e rematar no mes de xullo.
Con esta achega extra, a Deputación cubre os meses restantes da anualidade de 2019 e regularizará a súa achega a partir do ano 2020 cun convenio anual dun mínimo de 125.000 euros, xa reservados no proxecto de Orzamentos de 2020, para financiar as actividades do centro museístico durante un só exercicio, de xaneiro a decembro.
O presidente Valentín González Formoso destacou "o firme compromiso" da Deputación da Coruña con Exponav, "un museo de referencia a nivel estatal no seu ámbito e un importante recurso turístico para Ferrol e para a unha comarca na que a construción naval estivo sempre moi presente".