O conselleiro de Cultura e Turismo, Román Rodríguez, destacou hoxe o enorme futuro do Centro Superior de Hostelería de Galicia (CSHG) que marcará un “antes e un despois” na traxectoria do centro, con máis de 25 anos de historia, así como no resto do sector turístico galego. Fíxoo durante o acto de apertura do curso académico do CSHG na que tamén participou o reitor da Universidade de Santiago de Compostela (USC), Antonio López, así como profesores, alumnos e ex alumnos.
O titular de Cultura e Turismo destacou o papel deste centro da profesionalización e a mellora da formación dos axentes do sector turístico galego. Precisamente, puxo en valor a elevada inserción laboral do centro e lembrou que nos últimos anos foron máis de 1.500 os alumnos egresados, algúns deles recoñecidos a nivel mundial. “Agardamos que este curso académico sirva para que deades o mellor de vós mesmos e sigades facendo deste centro un referente no sector e un motivo de orgullo para toda Galicia”, engadiu dirixíndose aos alumnos do centro presentes na inauguración.
Román Rodríguez atribuíu o prestixio deste centro ao seu “modelo formativo exitoso”, centrado na empregabilidade e no contacto directo coas empresas e axentes do sector. Neste sentido, explicou que este modelo forma parte do plan de acción para converter o centro nun polo de innovación turística. Este proxecto inclúe a implantación do grao de Innovación Gastronómica e Xestión Hoteleira, que botará a andar na USC no curso 2021-2022, coincidindo coa celebración do Xacobeo 21.