As conclusións derivadas das distintas intervencións no Congreso Internacional de Termalismo, organizado polo proxecto "Raia Termal" no balneario de Lobios, poñen de manifesto o gran potencial do que dispón este territorio fronteirizo, abrindo un novo horizonte cara a explotación dos recursos inherentes ao territorio, atendendo ademais, as demandas do usuario e do sector cara a creación de oportunidades de turismo que complementen a oferta termal e que doten a estas zonas dun plus que poida atraer a turistas de calquera idade.
Varios dos relatores destacaron a necesaria colaboración entre as Administracións e as empresas xestoras, ademais de corroborar a necesidade de continuar a avanzar en políticas que fomenten o termalismo no rural como fonte e medio de vida e a necesaria sinerxía entre o turismo terapéutico e de benestar.
A intervención final da xornada a cargo da Confederación Hidrográfica Miño-Sil a través do director do proxecto, Manuel G. Sarria, concluíu que o inicio foi confuso pero a estreita colaboración e sintonía entre os socios, Deputación de Ourense, as Cámaras Municipais de Melgaço e Terras de Bouro e a CHMS foi a clave para conseguir o obxectivo de mellorar as contornas termais e potenciar o termalismo como oportunidade de futuro socio-económico que contribuirá a dar estabilidade económica e familiar aos novos habitantes que se asenten no rural.
O congreso foi clausurado polo vicepresidente da Deputación de Ourense, Rosendo Fernández, que aproveitou para destacar a importancia da temática abordada neste evento internacional convertido "nun espazo de reflexión sobre a procura de fórmulas de cooperación para manter e incrementar a contribución do sector termal ás economías dos pequenos municipios nos que maioritariamente se asentan as instalacións balnearias". Este congreso permitiu resaltar "o valor social do sector, visibilizar a importancia da actividade económica que xera e demostrar a importancia que ten o termalismo para combater o reto demográfico", engadiu o vicepresidente da Deputación de Ourense, quen lembrou que se trata dun sector que "permite fixar poboación e emprego nos seus ámbitos territoriais, espazos rurais que, en moitas ocasións, presentan desequilibrios demográficos aos cales a economía termal pode axudar a combater".