A Deputación de Lugo impulsa unha rede profesional para potenciar Os Ancares e O Courel como destino de turismo científico. Estará formada polos 16 concellos da provincia deste espazo natural, universidades, administracións encargadas do deseño de políticas turísticas, empresas de turismo, fundacións e investigadores vinculados ao turismo científico deste territorio. Para favorecer a participación destes axentes na rede, debater temas e propostas e recoller as opinións dos participantes crearase un foro dixital.
Así o avanzou a deputada de Réxime Interior, Promoción do Territorio e Turismo, Pilar García Porto, acompañada da directora de Observer Science Tourism, Maite Vence Fernández, na presentación da creación desta Rede Profesional de Turismo Científico para o territorio dos Ancares e O Courel co fin de continuar impulsando novas iniciativas turísticas vinculadas á ciencia neste espazo natural da provincia.
García Porto subliñou que “na Deputación damos un paso máis para fomentar un turismo sostible nas Montañas de Ancares e Courel e impulsamos esta rede co obxectivo de que sexa unha plataforma de difusión, cooperación, deseño e planificación de novas estratexias que posicionen esta zona da provincia de Lugo como un destino turístico diferenciado, baseado na sustentabilidade, e vinculado ao turismo de natureza e á ciencia cidadá”.