Martín Barreiro seguirá a ser a cara das campañas Lugo Cambia

A Deputación de Lugo dálle continuidade á imaxe do recoñecido físico e presentador de televisión lucense Martín Barreiro como embaixador da provincia de Lugo para o desenvolvemento de novas accións de promoción e consolidación da marca turística Lugo Cambia creada pola Deputación no marco do Plan Estratéxico de Turismo.

A Xunta de Goberno aprobou a contratación de Barreiro para este fin. “Cremos que unha persoa coma el moi recoñecida socialmente a nivel nacional, cunha imaxe positiva e de credibilidade, e con grandes dotes comunicativas, contribúe de xeito importante a proxectar a imaxe da nosa provincia no exterior”, subliñou a voceira socialista do Goberno e Deputada de Turismo, Pilar García Porto.