Vilagarcía acolle un ano máis o Gran Capítulo da Confraría dos Viños de Rías Baixas, un acto que nesta ocasión reunirá a 120 representantes de 30 confrarías vinícolas e gastronómicas procedentes de España, Portugal, Francia e Italia. Os actos do Capítulo celebraranse o sábado 17 de agosto e consistirán nunha recepción oficial no Concello, un desfile da comitiva integrada por todos os representantes das confrarías que participan no evento e o Gran Capítulo, no que se nomearán aos novos cabaleiros e donas.
Neste ano a entidade nomeará a 12 novos membros da Confraría, homes e mulleres que destacan en diversos campos relacionados coa viticultura e a gastronomía, tanto no eido da produción, comercialización ou a investigación, como no da promoción e divulgación dos viños Rías Baixas.
Entre a lista de nomeamentos destacan a investigadora do CSIC, María del Carmen Martínez Rodiño e Julián Benitez Villanova, o que fora director da Estación Experimental de Viticultura e Enología de Ribadumia. Tamén recibirán a capa da Confraría dos Viños Rías Baixas o anterior concelleiro de Promoción Turística de Vilagarcía, Juan Antonio Pérez Callón; Iginio Gutiérrez Perojo, representante do grupo Freixenet en Cantabria e Enrique Covelo Rodríguez, da Orden da Cigala de Marín, entre outros.
Os actos do XV Capítulo da Confradría dos Viños Rías Baixas forn presentados no Concello nun acto que contou coa presenza dos concelleiros de Turismo e de Medio Ambiente, Álvaro Carou e Diego García, o presidente e Gran Mestre da Confraría, Jesús Paz e o vicepresidente Ramón Paz.