Fin de semana viñateiro e festeiro en Salvaterra

Vinte e oito adegas na Festa do Viño do Condado de Tea que se celebra en Salvaterra do Miño entre o venres 23 e o domingo 25 de agosto con catas, postos de comida e concertos como os do artista do Morrazo Xosé Manuel Budiño. 

Un ano máis, o recinto amurallado de Salvaterra está xa a punto para acoller a LX edición da festa, durante a cal elixirase aos mellores viños do ano no Condado de Tea. Os “Deliciosos do ano” serán dados a coñecer o domingo día 25, tras o nomeamento dos novos membros da Confraría dos Viños do Condado deTea e Espumosos e antes da lectura do pregón, que correrá a cargo do xornalista Jose Manuel Orriols. 

O domingo, como ven sendo habitual, Salvaterra acollerá o tradicional desfile de autoridades, bandas de gaitas e grupos folclóricos, así como o nomeamento dos novos membros da Confraría dos Viños do Condado de Tea e Espumosos e o anuncio dos gañadores da Cata Oficial. Actos que terán lugar no Salón de Plenos do Concello de Salvaterra. 

Con varios centenares de mesas con antucas, a festa do viño do Condado cambia practicamente de aspecto sendo o recinto amurallado o escenario elixido para os tres días. Desta forma, os asistentes poderán estar máis cómodos tanto nas " noites gastronómicas" como durante a venda dos viños que realizarán os propios adegueiros.