Este fin de semana volve a festa de exaltación da ameixa galega por excelencia, esa “con denominación de orixe” de Carril, que dous anos despois de celebrar as súas vodas de prata segue máis viva que nunca.
Gastrónomos e xente de bo padal reuniranse unha vez máis para degustar o bivalvo que lle deu fama aos parquistas de Carril, eses profesionais que representan o bo facer dun oficio organizado dende hai cinco séculos, garantes da calidade dunha ameixa que se diferencia polo seu sabor sutil e pola finura da súa textura.
Non faltarán ocasións para degustala durante a festa, pois gran parte do programa xira arredor do prezado froito do mar. De feito, un dos momentos fortes do sábado é o concurso de pratos elaborados con ameixa de Carril, onde profesionais e amateurs competirán con elaboracións que serán puntuadas por un xurado profesional e degustadas polo público.
Amenizarán o concurso os gaiteiros Airiños do Carril, nunha xornada na que tamén haberá regata de botes tradicionais a remo e concerto de Soüldiers.
Para o domingo, trala recepción de autoridades e desfile polas rúas da vila está previsto un pregón a cargo do coñecido actor galego Luís Zahera, que este ano conseguiu o Goya ao mellor actor de reparto por “El Reino”.
Cando remate, tocará vestirse de gala co nomeamento dos novos Cabaleiros e Donas da Orde da
Ameixa. E a partir de aí, só restará dedicarse a degustar as ameixas co grupo 7 setenta de fondo.
Iso si, que ninguén marche cando remate o prato. Coa chegada da noite Manuel Manquiña animará a festa co seu grupo Los Fabulosos Weekend.