Dende o 10 ata o 18 de agosto celebrarase nas rúas Serra e César Boente de Pontevedra a XXVIII Feira do mel "Meleira", que este ano contará con vinte postos fronte aos oito do ano pasado, celebrándose de forma paralela ás Festas da Peregrina.
O evento foi presentado no Mercado de Abastos pola concelleira Yoya Blanco; o presidente de CCU ZM, Miguel Lago, e os voceiros das entidades organizadoras Luz Gómez e Claudio Fraga (de Emrede e a Asociación de Apicultores da Provincia de Pontevedra).
Tal e como apuntou Luz Gómez, seguindo a traxectoria doutros anos poderanse mercar distintos tipos de meles, polen, xaleas, propóleos e outros produtos de apicultores locais, que axudan a conservar o medio rural, manter a biodiversidade, dar a coñecer a importancia das abellas no proceso de polinización e a conservación da flora.
Este ano cóntase coa colaboración e participación de Emrede, unha rede de mercados locais con produtos artesáns e ecolóxicos que se vén celebrando en distintos concellos (Moraña, Meis, A Lama, Soutomaior, Campolameiro e outros a celebrar proximamente) e nos que os visitantes poden mercar produtos agroalimentarios ecolóxicos e artesanais: pan, viños, aceites, queixos, licores, larpeiradas, téxtil…
Haberá un espazo chill out onde se poderán saborear cervexas artesanais e batidos ecolóxicos e os rapaces poderán facer distintas actividades. Asemade, instalarase a exposición ‘A retranca dun país’, de Luís Davila, onde se amosarán as viñetas que representan á sociedade galega do rural, o mundo mariñeiro e a actualidade, vista dende unha óptica reflexiva e humorística.
Obras de teatro onde as protagonistas serán as abellas e a natureza e diversos parladoiros onde se dará a coñecer a importancia das abellas ou o problema das vespas velutinas completarán o programa de actividades da Feira do Mel, que, segundo destacou Yoya Blanco, “acadou tal nivel de consolidación que xa case non se poden pensar as Festas da Peregrina sen ‘Meleira'”.