Paco Gómez, do restaurante pulpería A Feiriña de Ourense, e Alejandro Méndez e Alejandro Ares, do restaurante Os Cachivaches de Lugo, lograron o recoñecemento do xurado profesional e o do xurado popular, respectivamente, como mellores cociñeiros de petiscos no marco da V Gala Showcooking De Tapas por Galicia, celebrada onte á noite pola Xunta de Galicia. No evento participaron os representantes das sete grandes cidades galegas que foron previamente gañadores dos concursos locais de tapas do pasado ano.
O premio do xurado profesional recaeu na tapa Mantiña de castañas, elaborada por Paco Gómez, chef do restaurante pulpería A Feiriña de Ourense. O segundo clasificado foi Rubén González, do restaurante El Cafetín de Pontevedra co petisco O polbo emigrante atlántico & oriental, mentres que o terceiro posto foi para Alejandro Méndez e Alejandro Ares, do restaurante Os Cachivaches, en Lugo, coa tapa Bonito ti!!, que obtivo tamén o primeiro premio do xurado popular.
Ademais do establecemento lucense, os membros do público recoñeceron en segundo lugar o petisco de Rubén González, de El Cafetín, mentres que o terceiro posto foi para Tomás Rubio, do restaurante A Viaxe de Santiago co seu Montadito de tenreira galega e Arzúa-Ulloa.
‘De Tapas por Galicia’
De tapas por Galicia enmárcase no obxectivo da Consellería de Cultura e Turismo de difundir a creatividade e innovación dos cociñeiros galegos como elemento de promoción do turismo urbano. Ten en conta tamén o feito de que os visitantes se interesen cada vez máis pola enogastronomía, onde a cociña en pequeno formato se posiciona como unha oportunidade para promover a cociña galega en calquera época do ano.
O certame deste ano contou coa participación de Pablo Fuentes, gañador do Tapéate Ferrol (Ferrol); Nelssy Soriano, do concurso Concurso de Tapas Picadillo (A Coruña); Tomás Rubio, gañador de Santiago(é)Tapas (Santiago de Compostela); Rubén González, gañador de Pontedetapas (Pontevedra); Pedro Méndez, gañador do concurso de Tapas Petisquiño (Vigo); Paco Gómez, gañador do Concurso de Pinchos Sabores de Ourense (Ourense) e Alejandro Méndez e Alejandro Ares, gañadores do Concurso de Tapas de Lugo (Lugo).